ភ្នំពេញ៖ ព្រះភិក្ខុវជិរប្បញ្ញោ សាន សុជា បានលាចាកសិក្ខាបទនៅថ្ងៃទី២១ ខែឧសភា ឆ្នាំ២០២៣ ពីទឹកដីប្រទេសអូស្ត្រាលី ក្រោយសាងផ្នួសអស់រយៈពេលជាង ៣០ឆ្នាំ។ មុនលាចាកសិក្ខាបទជាភិក្ខុ ព្រះតេជគុណ សាន សុជា មានសង្ឃដីកាប្រាប់ដល់ពុទ្ធបរិស័ទថា៖ «ញាតិញោមអាចចាកចេញពីអាត្មាបាន តែកុំចាកចេញពីព្រះធម៌»។

អតីតសង្ឃ សាន សុជា បានប្រាប់មូលហេតុដែលលាចាកសិក្ខាបទដូច្នេះថា៖ «ខ្ញុំព្រះកុរណាសម្រេចដាក់នៅពេលនេះ មិនមែនព្រោះអ្វីទាំងអស់ គឺព្រោះតែជាគោលការណ៍ដំណើរជីវិតផ្ទាល់ខ្លួនប៉ុណ្ណោះ មិនមានសម្ពាធអ្វី សូម្បីតែរស់នៅទីនេះ ប្រជាពុទ្ធបរិស័ទយកចិត្តទុកដាក់»។

អតីតព្រះតេជគុណ សាន សុជា បានផ្តាំដល់ពុទ្ធបរិស័ទទាំងអស់ថា ក្រោយពេលលាចាកសិក្ខាបទ គ្រហស្ថ សាន សុជា មិនទាមទារអ្វីពីពុទ្ធបរិស័ទទៀតឡើយ ពោលលោកនឹងបន្តរស់នៅដោយពឹងផ្អែកលើខ្លួនឯង។

គ្រហស្ថ សាន សុជា បាននិយាយក្នុងនាមជាព្រះភិក្ខុចុងក្រោយដូច្នេះថា៖ «អ្នកធ្លាប់យកចង្ហាន់មកហ្នឹង អាចផ្អាកមក មិនទាមទារអ្វីទៀតទេ។ សម្រាប់ខ្លួនឯងមិនទាមទារ ប៉ុន្តែទាមទារមួយ គឺអាត្មានៅស្រុកឆ្ងាយ សូមផ្តាំទៅស្រុកខ្មែរផងដែលធ្លាប់គោរពស្រឡាញ់អ្នកម្តាយពីមុនមក សូមរក្សាការរាប់អានជាមួយគាត់ ទុកជាការដឹងគុណជាមួយអាត្មាទៅចុះ»។

ការសឹករបស់ព្រះអង្គ សាន សុជា បានធ្វើឱ្យពុទ្ធបរិស័ទជាច្រើនបានបង្ហាញការសោកស្តាយ ខណៈអតីតព្រះអង្គគឺជាព្រះអង្គមួយអង្គក្នុងចំណោមព្រះសង្ឃជាច្រើនទៀតដែលត្រូវបានមហាជន និងពុទ្ធបរិស័ទតែងតែគោរព និងប្រតិបត្តិនូវការទូន្មានព្រះធម៌របស់ព្រះអង្គ។

អតីតព្រះតេជគុណ សាន សុជា បានផ្តាំដល់ពុទ្ធបរិស័ទដូច្នេះថា៖ «កុំចង់បានរបស់ដែលអត់ កុំជាប់នឹងរបស់ធ្លាប់មាន អ្វីៗមានហេតុទើបកើតឡើង»៕